|
Sienkewicz Latin Declamatio Contest
Somnium Habeo
a Martino Luthero Rege, Iuniore
Hodie vobis dico, mei amici, contra difficultates et momenti temporis
vana, adhuc somnium habeo. Id est somnium alte inveteratum in Somnio
Americano.
Somnium habeo uno die hanc nationem surrecturam esse et fidem suam vere
servaturam: “Tenemus has veritates manifestas esse—omnes homines aequos
creatos esse.”
Somnium habeo uno die, in collibus rubris Georgiensibus, filios illorum
servorum et filios illorum dominorum una ad germanitatis mensam
consessuros esse.
Somnium habeo uno die etiam civitatem Mississippiensem—civitatem
desertam incendentem iniuria et servitudinis calore—in libertatis
iustitiaeque oasem mutatum iri.
Somnium habeo uno die meos quattuor liberos parvos habitaturos in
natione in qua non cutis colore iudicentur sed morum substantia. Somnium
hodie habeo!
Somnium habeo uno die civitatem Alabamiensem (cuius gubernatoris labra
nunc stillant interpositionis et recusationis verba) mutatum iri in
situm in quo pueri nigri et puellae nigrae possint coniungere manus cum
pueris puellisque albis, et una ambulare ritu sororum fratrumque.
Somnium hodie habeo!
Somnium hodie habeo. Somnium habeo uno die omnem vallem elatum iri,
omnem montem demissum iri, loca aspera plana factum iri, et loca prava
recta factum iri, et Domini gloriam patefactum iri et omnes eam una
visuros esse.
Haec est spes nostra. Haec est fides quacum ad regionem australem redeo.
Hac fide poterimus mutare Reipublicae tinnulas discordias in
germanitatis symphoniam pulchram.
Hac fide simul laborare poterimus, simul orare, simul contendere, simul
ad carcerem ire, simul pro libertate adstare poterimus scientes nos uno
die liberos futuros esse.
Hic erit dies in quo Dei liberi omnes poterint significatione nova
canere, “Patria mea, de te, libertatis terra dulcis, de te cano. Terra
in qua patres mei mortui sunt, terra peregrinatoris decoris, de omnis
montis lateribus libertas resonet.”
Et si America natio magna futura est, hoc verum fieri oportet.
Ergo libertas resonet de Novae Hanoniae ingentibus summis collibus.
Libertas resonet de Novi Eboraci magnis montibus. Libertas resonet de
Pennsylvaniensibus Allegheniis amplificantibus.
Libertas resonet de Coloradiensibus Scopulosis nivosis.
Libertas resonet de Californiensibus clivis formosis!
Sed non solum ita: Libertas resonet de Georgiensi Monte Lapideo.
Libertas resonet de omni Mississippiensi colle et grumulo. Libertas
resonet de omnis montis lateribus. Quando permittimus ut libertas
resonet, quando permittimus ut resonet de omni pago et omni vico, de
omni civitate et omni urbe, poterimus maturare illam diem in qua Dei
liberi, nigri albique, Judaei et Gentiles, Protestantes et
Catholici--omnes poterunt coniungere manus et canere verba illius
Nigrorum hymni antiqui, “Tandem liberi, tandem liberi! Deo Omnipotenti
gratias agite, tandem liberi sumus!” |